• Accueil
  • > حوار صريح مع لص مغربي ظريفـ

حوار صريح مع لص مغربي ظريفـ

حوار صريح مع لص مغربي ظريفـ 862parlement…………………………………………………*

علاش كتسرق ؟!

** واش بغيتيني ندير ؟!

* تقلب ليك على شي خدمة .

** المغرب جوج خدايم اللي فيه ، يا اما تشفارت واما تسعايت ، وانا دابا

راني خدام فتشفارت !

* أشنو كتسرق ؟

** اللي جابها سيدي ربي نسرقها !

* بحال آش ؟

** ما قل وزنه وغلا ثمنه !

* ما فهمتش .

** بحال البورطابلات والبزاطم والسلاسل ديال الذهب …وزيد وزيد…

* ما كتخافش من البوليس ؟

** البوليس هوما اللي كايخافو مني !

* فراسك خوتك فالحرفة طيروا البورطابل ديال والي أمن كازا مسيو عبروق ؟

** فراسي …هادي وقعات شحال هادي .

* أشنو كايعني ليك هادشي ؟

** هذا يدل على أن البوليس ديال المغرب ما فيدوش !

* عمرك دخلتي الحبس ؟

** كنت فيه شي جوج مرات .

* وكيف هي الحياة داخل السجن ؟

** بحال جهنم تماما ! ولكن كيفما كان الحال الحبس حسن من برا .

* تسجلتي فاللوائح الانتخابية ؟

** عاود أش كلتي !

* كلت ليك واش غاتصوت فالانتخابات الماجية ؟

** واش انتا ضريك الله ولا مالك ؟ أنا بعدا ساليت مع راسي ، بقا لي غير نشارك فالانتخابات !

* اذن انتا ماشي ديمقراطي .

** هادوك كروش الحرام اللي كايترشو الانتخابات اللي ماشي ديمقراطيين ! ونزيدك راه بحالي بحالهم ، غير هوما كيسرقوا بالعلالي ، وانا كانديرها حسي مسي !

* ويلا طبز ليك شي واحد شي مية درهم ، زعما ماغاتصوتش ليه؟

** والله أسيدي لا صوت لباباه ! واخا كتشوفني شفار ، الكرامة ديالي راها فوق كل اعتبار !

* وايلي حتى لهاد الدرجة ؟!

** أنا نهار نصوت لشي واحد عرف الشمس غادي طلع من الغرب !

* الى تلاقيتي مع الملك ، أش غاطلب منو ؟

** ماغانطلب ليه والو !

* زعما ؟!

** والله العظيم !

* يقدر يعطيك شي كريمة .

** ما بغيتهاش ! أنا قلت ليك الكرامة ديالي فوق كل اعتبار !

* كتفرج فالأخبار ديال القناة الأولى ودوزيم ؟

** حتى يقولوا ليك راني حماقيت ديك الساعة يمكن ليك طرح علي هاد السؤال ! أنا عمري ما كنتفرج لا فقناة دار البريهي ولا فقناة عين السبع ، حتى الى جاب الله دخلت لشي قهوة ولقيتهم شادين اتم ولا دوزيم أول حاجة كانطلبها هي يزابيو لشي قناة أخرى ، والى ما بغاوش كانخرج فحالي !

* ما هي أكبر أمنية تتمنى أن تتحقق لك ؟

** أريد أن أكون برلمانيا أو وزيرا كي أصير لصا كبيرا

محمد الراجي

2 Réponses à “حوار صريح مع لص مغربي ظريفـ”

  1. star dit :

    chofar mn dakchi iwa had lmara ila tlabtiha tlabha kbira

  2. noha dit :

    ناري عليه كيموت بالضحك و الا يعرف فيه الدرك يشده الحبس
    ولكن للآسف كيوضح الصورة اللي بقى المغرب عليها دابا

    الله يستر و يرحمنا الهي

Laisser un commentaire